राजकुमार भुजेल,दोलखा।
सदरमुकाम चरिकोमा “तेस्रो बृहत दोलखा महोत्सव २०८१” सुरु भएको छ। “दोलखाको पहिचान कृषि, पर्यटन र पानी स्थानीय उत्पादन र उद्यमशिलतामा लगानी” भन्ने मूल नारासहित महोत्सव सुरु भएको हो।
महोत्सव फाल्गुन १८ गतेसम्म सदरमुकाम चरिकोट स्थित भिमेश्वर रङ्गशालामा दोलखा उद्योग वाणिज्य महासंघको आयोजनामा सुरु भएको हो। महोत्सवको उदघाटन बागमती प्रदेशका मुख्यमन्त्री बहादुर सिंह लामाले गरेका थिए।
जिल्लाका उद्यमीहरूबाट उत्पादित बस्तुहरूको प्रदर्शनी, बजारीकरण र बिक्री गरी जिल्लाको आर्थिक कारोबारलाई क्रियाशील गराउने, दिगो आर्थिक विकासबारे सरोकारवालाहरू बीच साझा धारणा र तत्परता विकास गर्ने, साथै दिगो आर्थिक विकासको लक्ष्यमा संघको संस्थागत क्षमता विकास गर्ने दोलखा उद्योग वाणिज्य संघको मुख्य उद्देश्य रहेको छ ।
जिल्लाका समग्र ऐतिहासिक, धार्मिक, सांस्कृतिक झाँकीहरूको प्रदर्शनी, राष्ट्रिय तथा स्थानीय स्तरमा ख्यातिप्राप्त कलाकारहरूको सांस्कृतिक प्रस्तुति,स्थानीय उत्पादन तथा जिल्लाका धार्मिक, सांस्कृतिक एवम् पर्यटकीय स्थलहरूको डिजिटल डिस्प्लेमार्फत वृत्तचित्र प्रदर्शनी,महोत्सव स्थलदेखि भ्यूटावर हुँदै देउरालीसम्म घोडचढी सञ्चालन हुने संघले जनाएको छ।
