काठमाडौं, साउन १६ – कुख्यात आपराधिक पृष्ठभूमिका व्यक्ति चक्रे मिलनको जन्मदिनको बहानामा गुण्डागर्दीमा संलग्न व्यक्तिहरूको जमघट भएको सूचनाका आधारमा प्रहरीले बिहीबार मध्यराति विशेष अप्रेसन सञ्चालन गरेको छ।
काठमाडौं प्रहरी परिसर र उपत्यका अपराध अनुसन्धान कार्यालयको संयुक्त टोलीले सादा पोशाकमा ठमेल र महाराजगञ्ज क्षेत्रमा अप्रेसन चलाएको हो। उक्त अप्रेसनबाट प्रहरीको टोलीले आपराधिक क्रियाकलापमा संलग्न रहेका धेरैजसो व्यक्तिहरूलाई नियन्त्रणमा लिएको छ।
एक प्रहरी अधिकारीका अनुसार, चक्रे मिलनको ‘बर्थडे पार्टी’ मा संवेदनशील र आपराधिक पृष्ठभूमि भएका व्यक्तिहरूको भीड लागेको सूचनाको आधारमा कारबाही गरिएको हो।
‘सानुभाइ’ युवराज गुरुङ पनि पक्राउ
प्रहरीले यस अप्रेसन अन्तर्गत गुण्डा गतिविधिमा संलग्न ‘सानुभाइ’ उपनामले चिनिने युवराज गुरुङलाई पनि बुधबार राति नै पक्राउ गरेको छ। गुरुङ उपत्यकामा सक्रिय आपराधिक गिरोहका सदस्य भएको प्रहरी स्रोतको दाबी छ।
अप्रेसन अझै जारी
प्रहरीले यस अप्रेसनलाई गम्भीर सुरक्षा रणनीतिको हिस्सा भन्दै थप अनुसन्धान भइरहेको जनाएको छ। पक्राउ परेकाहरूको पुराना अपराधिक अभिलेख, हतियार सम्पर्क, र सञ्जालगत आपराधिक गतिविधिमा संलग्नता बारे अनुसन्धान अघि बढाइएको छ।
सुरक्षा स्रोतका अनुसार, सामाजिक कार्यक्रमको नाममा आपराधिक जमघट बढ्न थालेपछि प्रहरीले अब यस्ता क्रियाकलापमाथि कडाइ गर्ने नीति लिएको छ।
