दोलखाको जोखिमयुक्त ढुङ्गा व्यवस्थापन गरेर नेपाली सेनाको टोली फर्कियो

भाद्र २९ । दोलखा स्थित विगु गाउँपालिका ४ खोलिखिम बजारमाथि रहेको जोखिमयुक्त ढुङ्गाको व्यवस्थापन सकिएको छ । नेपाली सेनाको टोलीले १० दिनको प्रयासपछि सफलतापूर्वक ढुंगाको व्यवस्थापन गरेको हो ।

ढुङ्गाको व्यवस्थापन भएपछि सेनाको टोलीलाई खोलिखिम बजार व्यवस्थापन समितिको आयोजनामा विगु गाउँपालिका अध्यक्ष सन्जिव ओली लगायत जनप्रतिनिधि, बजार व्यवस्थापन समितिका अध्यक्ष विमल ओली र स्थानीयले बाजागाजा सहित विदाई गरेका छन् ।

ढुङ्गाको व्यवस्थापनका लागि १२ सय किलो (इम्युजन) बिष्फोटक पदार्थ, २६० वटा डिटोनेटर र १० हजार मिटर डेट कार्ड लिएर सेनाको टोली सिंगटी पुगेको थियो । करिब ३७ मिटर लामो ढुङ्गालाई सेनाको टोलीले १३ पटक बिष्फोट गराएर ढुङ्गा फुटाएको हो । १० दिनको प्रयासपछि उक्त ढुङ्गाको व्यवस्थापन सकिएको हो । बजारमाथि रहेको उक्त ढुङ्गा खस्ने जोखिम बढेपछि खोलिखिम बजारका ३२ घरपरिवारलाई सुरक्षित स्थानमा सारिएको थियो । उक्त जोखिमलाई हटाउन जिल्ला प्रशासन कार्यालयले विष्फोट गराएर ढुङ्गाको व्यवस्थापन गर्न सरकारलाई पत्राचार गरेको थियो । लगतै, विगु गाउँपालिकाका अध्यक्ष सञ्जीव ओलीले प्रधानमन्त्री पुष्पकमल दाहाललाई भेटेर हेलो सरकार मार्फत गुनासो राखेपछि प्रधानमन्त्री दाहालले उक्त ढुङ्गाको तत्काल व्यवस्थापन गर्न रक्षा सचिव किरणराज शर्मालाई निर्देशन दिएका थिए । वर्दिबासबाट खटिएको सेनाको टोलीले भदौ १८ गतेबाट ढुङ्गाको व्यवस्थापन गर्न सुरु गरेको थियो । सो कार्यमा नेपाली सेनाको चरिकोटस्थित तारादल गणले पनि सहयोग गरेको थियो ।

ढुङ्गाको व्यवस्थापन पछि गाउँपालिका अध्यक्ष सञ्जीव ओलीले नेपाली सेनाको टोलीलाई धन्यवाद व्यक्त गरेका छन् । ढुङ्गाको सफल व्यवस्थापनपछि सेनाको टोली आज बर्दिवास फर्किएको छ ।