दोलखामा गाडी भाडामा व्यवसायीको ठगी, यात्रु मर्कामा

अबिरल बस्नेत ` सुरज´

दोलखा । चाडपर्वको मौकामा दोलखामा सवारी साधनहरूले मनपरी भाडा असुलेपछि यात्रु मर्कामा परेका छन् । दोलखा देखि काठमाडौं सम्मको बस भाडा ५ सय रुपैयाँ तोकिएको भएपनि यातायात व्यवसायीले दोब्बर भाडा असुलेपछि यात्रु मर्कामा परेका हुन् ।

दोलखाका ग्रामीण सडकमा साना जीप तथा बोलेरो गाडीहरुले पनि निर्धारित भाडाभन्दा दोब्बर रकम लिइरहेका छन् । व्यवसायीहरूले चाडपर्वको फाइदा उठाउँदै भाडामा मोलमोलाइ गरिरहेका छन्।

यस वर्ष ट्राफिक प्रहरीले सवारी साधनको जाँचमा कडाइ गरेको बताएपनि सवारी साधनमा भाडामा ठगी तथा क्षमताभन्दा बढी यात्रु बोक्ने काम भइरहेको छ ।

अर्कोतर्फ रिजर्भको नाममा पनि व्यवसायीले यात्रुहरूलाई ठग्ने गरिरहेका छन् । ट्राफिक प्रहरीको वेवास्ताका कारण ठगी गर्ने यातायात व्यवसायीहरु झनै हौसिएका छन् । यात्रु लुटिइरहँदा प्रशासन भने मौन छ ।