प्रभावशाली नेताले पार्टी छाड्ने निर्णयपछि दोलखा एमालेमा हलचल

अबिरल बस्नेत `सुरज ´

दोलखा, ११ असोज — स्थानीय तहमा रिक्त पदका लागि निर्वाचन घोषणा भएसँगै दोलखा एमालेमा हलचल सुरु भएको छ । जिल्लामा एमालेका प्रभावशाली नेता मानिएका र हाल गौरीशंकर गाउँपालिकाको उपाध्यक्ष पदमा प्रभावशाली उम्मेदवारका रूपमा हेरिएका डिल्लीध्वज बस्नेतले पार्टी छाडेपछि दोलखा एमालेमा संकट चुलिएको हो ।

बस्नेतले शुक्रबार पछिल्लो राजनीतिक परिवेश र ब्यक्तिगत कारण देखाएर राजीनामा दिँदै पार्टीबाट अलगिएको घोषणा गरेपछि रिक्त स्थानीय तहको उम्मेदवारलाई लिएर दोलखा एमालेमा खैलाबैला मच्चिएको छ ।

त्यसोत, लामो समयदेखि दोलखामा रही एमाले राजनीतिमा सक्रिय रहेका बस्नेत, एमाले दोलखाका जिल्ला कमिटी सदस्य थिए । २०७४ को स्थानीय तह निर्वाचनमा वडा नं ५ को अध्यक्षमा भारी मतान्तरले विजयी भएका बस्नेतले गाउँपालिकाका प्रवक्ता र शिक्षा विभागको प्रमुखको जिम्मेवारी सम्हालेका थिए। गौरीशंकर गाउँपालिकाभित्र उत्कृष्ट काम गर्ने वडाध्यक्षको पहिचान बनाएका बस्नेतलाई पार्टीले २०७९ मा पनि वडाध्यक्षकै उम्मेदवार घोषणा गरेर अन्तिममा अर्कै व्यक्तिलाई टिकट दिएको थियो । त्यसयता पार्टीभित्र असन्तुष्ट देखिएका उनले अन्ततः पार्टी नै परित्याग गरेका हुन् ।

पार्टीमा लामो समय योगदान गरेका सदस्यहरूलाई उपेक्षा गर्दै बाहिरका ब्यक्तिहरुलाई टिकट दिन थालेपछि जिल्लाका पुराना नेताहरु एमाले पार्टी छाड्न बाध्य भइरहेका छन् । यसअघि, एमालेकै नवराज खड्काले पनि पार्टी छाडेर स्वतन्त्र उम्मेदवारी दिएका थिए। त्यसवेला एमालेले अधिकांश वडामा बाह्य पार्टीबाट ल्याइएका ब्यक्तिलाई उम्मेदवार बनाएको थियो । सो समयमा वडा नं ७ को वडाअध्यक्षमा उठेका एमालेका उम्मेदवारले नेपाली काँग्रेसका उम्मेदवारलाई २० लाखमा मत बिक्री गरेको आरोप लागेको थियो ।

त्यसयता एमालेको निर्णय प्रक्रियामा असमानताले पार्टीभित्र चरम असन्तुष्टि देखिइरहँदा अझै थप उम्मेदवारहरूको पार्टी छोड्ने सम्भावना बढेको छ ।