जिरी दोभान गाउँका २७ घर पहिरोको उच्च जोखिममा 

दोलखा। दोलखाको जिरी नगरपालिका –३ स्थित दोभान गाउँका २७ घरधुरी पहिरोको उच्च जोखिममा परेको छ । गत श्रावण १० गते परेको अविरल वर्षाका कारण आएको पहिरोले बस्ती आसपासमा क्षतिग्रस्त बनाएपछि दोभान गाउँ अहिले पहिरोको उच्च जोखिममा परेको हो ।

बस्तिको चारैतिरबाट आएको पहिरोले यतिबेला दोभान बस्तिका अधिकांश स्थानीयहरु उच्च जोखिम मोलेर बस्न बाध्य भएको स्थानीयहरुको भनाइ छ । स्थानीयका अनुसार आफुहरु मृत्युको दोसाँधलाई अङगालेर बस्न बाध्य भएको र समयमै सम्बन्धित निकायले ध्यान नदिए सिङ्गो बस्तिलेनै ठूलो बज्रपात बेहोर्नुपर्ने चिन्ताले पिरोलेको गुनासो गरेका छन् । पहिरोको जोखिमबारे आफुहरुले वडा र नगरपालिकालाई जानकारी गराए पनि खासै वास्ता नगरेको र एउटा एउटा त्रिपाल वितरण गरेर टारेको स्थानीयहरु बताउँछन् । अहिलेसम्म आफुहरुले अमुल्य भोट दिएर विजय गराएका जनप्रतिनिधिहरु सम्पर्क बिहिन जस्तै भएको र जिरी नगरपालिका -३ को दोभान बस्ती कर्णालीमा परिणत भएको उहाँहरुको भनाइ छ ।

सिङ्गो बस्तिनै पहिरोको उच्च जोखिममा परेकोबारे आफुलाई जानकारी भएपछि नेकपा एमाले बागमती प्रदेश कमिटीका सदस्य लक्ष्मण गुभाजु आइतबार स्थलगत अनुगमनका लागि उक्त स्थानमा पुगेका थिए । स्थलगत अनुगमनका लागि युवा नेता प्रदेश सदस्य गुभाजु र रिपोर्टिङका लागि जिरीका पत्रकार नबिन सुनुवार उक्त बस्तीमा पुगेपछि पहिरो पीडितहरुमा थप खुशी मिलेको थियो । अहिलेसम्म कोहि मिडिया र राजनिती दल नआए पनि पहिरो पीडितको गुनासो सुन्न र समाधानको विकल्पमा लैजान आफुहरु आएकोमा पीडितहरुले खुशी व्यक्त गर्दै आफुहरुले चाडै जोखिमबाट छुटकाराको अपेक्षा गरेको बताए। 

स्थलगत अनुगमन पश्चात् दोभान गाउँ साच्चै पहिरोको उच्च जोखिममा रहेकोले आफ्नो व्यक्तिगत र पार्टीको तर्फबाट राहतको पहल गर्ने प्रदेश कमिटी सदस्य गुभाजुले पहिरो पीडितलाई प्रतिबद्धता व्यक्त गरे ।