अबिरल बस्नेत `सुरज´
दोलखा । माथिल्लो तामाकोशी जलविद्युत् आयोजनास्थलमा भएको करोडौं रुपैयाँको सामग्री चोरी प्रकरणमा पक्राउ परेका तीनजना धरौटीमा छुटेका छन्।
मंगलबार जिल्ला अदालत दोलखाका न्यायाधीश माधवप्रसाद सुवेदीको इजलासले विधिचन महतो (कोइरी), छिरिङ शेर्पा (कामें र निमा तामाङलाई प्रतिब्यक्ति ३ लाख ३० हजार धरौटीमा रिहा गर्न आदेश दिएको हो।
गत असोज ११ र १२ गतेको बाढीले क्षति पुर्याएको आयोजनास्थलमा पुनर्निर्माणका काम भइरहेका बेला गत कार्तिक १७ गते विद्युतीय उपकरण, तामा, फलाम, आल्मुनियम, र अन्य धातुजन्य सामग्री चोरी भएको थियो। उक्त सामग्री अपर तामाकोशी हाइड्रोपावर लिमिटेड कम्पनीको करोडौं मूल्य बराबरको सम्पत्ति रहेको बताइएको छ।
घटनापछि प्रहरीले च्छोरोल्पा कन्स्ट्रक्सनमा साइड इन्चार्जका रूपमा कार्यरत गौरीशंकर–७ का छिरिङ शेर्पा, सोही कन्सट्रक्सनका कामदार विगु गाउँपालिका–१ का निमा तामाङ, र सिँगटीमा कबाडी व्यवसाय सञ्चालन गर्ने विधिचन महतोलाई पक्राउ गरी अनुसन्धान सुरु गरेको थियो।
मंगलबार भएको सुनुवाइपछि तीनै जनालाई प्रतिब्यक्ति ३ लाख ३० हजार धरौटीमा रिहा गर्न आदेश दिइएको जिल्ला अदालत दोलखाका रजिष्ट्रारले जानकारी दिएका छन्।
प्रहरीको अनुसन्धानपछि जिल्ला सरकारी वकिलको कार्यालय दोलखाले उनीहरूविरुद्ध चोरीको मुद्दा दायर गरेको छ। अब अदालतमा थप कानुनी प्रक्रिया अघि बढाइनेछ।
