१० दिने बृहत दोलखा महोत्सव हुने

दोलखा । दोलखाको सदरमुकाम चरिकोटमा १० दिने बृहत दोलखा महोत्सव हुने भएको छ । दोलखा उद्योग वाणिज्य संघको आयोजनामा पुष १३ गतेदेखि २२ गतेसम्म महोत्सव हुन लागेको हो । विहीबार पत्रकार सम्मेलन गर्दै संघले महोत्सवको बारेमा जानकारी गराएको हो ।

आन्तरिक पर्यटन प्रवर्द्धन गर्दै जिल्लाको परिचय बाह्य क्षेत्रमा चिनाउने उद्देश्यले महोत्सव गर्न लागिएको संघका अध्यक्ष इन्द्र श्रेष्ठले बताए । श्रेष्ठका अनुसार खस्कँदो कृषि, आर्थिक तथा पर्यटन क्षेत्रलाइ उकास्ने साथै दोलखा जिल्लामा आन्तरिक तथा वाह्य पर्यटक भित्र्याई दोलखा जिल्लालाई सम्बृद्ध बनाउनका लागि महोत्सवले ठूलो भूमिका खेल्नेछ ।

महोत्सवमा औद्योगिक, हस्तकला, कृषि लगायतका प्रदर्शनी हुनेछन् । स्थानीय खानाका परिकारको स्वादसँगै मनोरन्जनात्मक कार्यक्रम, मनोरन्जनात्मक खेलहरु, धार्मिक, पर्यटकिय एवं ऐतिहासिक क्षेत्रको फोटो तथा वृत्तचित्र प्रदर्शनी, जिल्ला स्तरिय खेलकुद तथा सांस्कृतिक कार्यक्रम समेत हुने संघले जनाएको छ ।

महोत्सव अवधिभर दोहोरी गीत तथा जातिय भेषभूषा प्रतियोगिता, विद्यालय स्तरिय नृत्य प्रतियोगिता, विभिन्न झाँकी प्रदर्शनी लगायत विभिन्न खेलकुद प्रतियोगिता हुनेछ ।

महोत्सवकै अवसरमा चरिकोट टुँडिखेलदेखि भ्यूटावर हुँदै देउरालीसम्म घोडचडी समेत संचालन हुनेछ । महोत्सवमा स्थानीय उत्पादनका विभिन्न स्टल रहने छन् । जिल्लाका उत्कृष्ट कृषक र उद्यमीहरु साथै दोलखाका रत्नहरुलाई विशेष सम्मान गर्ने कार्यक्रम तय भएको छ । साथै दोलखाका ९ वटै स्थानीय तहहरुसँग आर्थिक बहस समेत संचालन गरिने संघले जनाएको छ ।

महोत्सव स्थल प्रवेशका लागि बिद्यार्थी, अपाङ्गता भएका र जेष्ठ नागरिकलाई सम्पूर्ण कार्यक्रममा विशेष छुटको ब्यवस्था गरिएको छ ।