हेटाैँडा, ५ असोज ।
तामाङ भाषा र नेपाली भाषामा निमार्ण गरिएको चलचित्र ग्याल्बो राजा हेटौँडामा तीन दिन विशेष शो हुने भएको छ । शनिबार पत्रकार सम्मेलन गर्दै चलचित्र युनिटले आउँदो १७, १८ र १९ गते विशेष शो रहने चलचित्रका निर्देशक विनायक तामाङले बताए ।
ग्रामीण भेगमा दलित र तामाङ समुदायबीचको अन्तर प्रेम कथामा आधारित सामाजिक चलचित्र ग्याल्बो राजामा अर्जुन गुरुङ, विनायक तामाङ, सङ्गीता तितुङ, मायादेवी मोक्तान, सञ्चवीर लो, किशोर श्रेष्ठ, मेम्बर लो, ऋतु तामाङ, रोजिना तामाङ, मनिका सिङ्तान, सञ्जय रुम्बा लगायतको कलाकारको अभिनय रहेको छ ।चलचित्र १७ र १९ गते तामाङ भाषामा र १८ गते नेपाली भाषामा चलचित्र प्रदर्शन गरिने निर्देशक तामाङले बताए । उनले भने-“हामीले १७ गते बिहान ९ बजे, १८ गते १२ बजे र १९ गते बिहान ९ बजे चलचित्र प्रदर्शन गर्नेछौं। चलचित्र आगामी कार्तिक ९ गते देशभर प्रदर्शन हुनेछ । चलचित्र मकवानपुरको विभिन्न स्थान र काठमाडौंमा छाँयाकन गरिएको उहाँको भनाइ छ । चलचित्र उत्कृष्ट बनेकाले हामीले पार्ट २ पनि निमार्ण गरिने निर्माता संगीता तितुङले बताए। चलचित्र निर्माणमा करिब २० लाख खर्च भएको छ । विशेषका लागि तीन सय रुपैयाँ टिकट शुल्क लाग्ने छ। चलचित्रको कथा लेखन निर्माण संगीता तितुङको रहेको छ भने चलचित्रका अन्य निर्मातामा किताबसिं घलान, रमेश स्याङ्तान, सञ्चवीर लो रहेका छन् ।कालीदेवी मिडिया हाउस प्रा.लिको व्यानरमा निमार्ण भएको चलचित्रलाई विश्व दोङ र नीमा दोङले संयुक्त रुपमा संगीत भरेका छन् । चलचित्रमा राजु किरातको द्वन्द्व र राजु शिशिरको नृत्य निर्देशन रहेको छ । निर्देशक तामाङले यसअघि सेमला दुङ्गाल, ज्योज्यो आले, मैच्याङ, चु-माया, मनको साथी, डम्फुरे लगायत १० वटा चलचित्र निर्देशन गरिसकेका छन् ।
त्यस्तै निर्माता तथा नायिका संगीता तितुङको अध्यक्षतामा सम्पन्न भएको कार्यक्रममा पत्रकार सम्मेलनमा चलचित्र पत्रकार सङ्घ नेपाल मकवानपुरका उपाध्यक्ष श्रीराम अर्जुन, तामाङ पत्रकार सङ्घ बागमती प्रदेशका उपाध्यक्ष ज्ञानेन्द्र तामाङ, मकवानपुर जिल्ला अध्यक्ष जयराम मोक्तान लगायतको उपस्थिति रहेको थियो।
